I meir enn 75 år har det palestinske folke levd med konsekvensane av okkupasjon, fordrivelse og systematiske brot på fundamentale menneskerettar. Etter Hamas sitt forferdelege terrorangrepet 7. oktober 2023 har situasjonen i Gaza eskalert til ei humanitær krise av historiske dimensjonar, som Israelske styresmakter må ta ansvar for.

Situasjonen i Gaza er ei humanitær katastrofe og ein moralsk kollaps. Infrastruktur, heimar, skular, sjukehus, kyrkjer og moskear er jamna med jorda. Mat, reint vatn, drivstoff,  medisin og helsehjelp er gjort utilgjengeleg for sivilbefolkninga. Born blir fråtatt retten til beskyttelse og skulegang. Titusenvis av sivile, kvinner og barn er brutalt drept, og enno fleire er lemlesta og påført skader for livet. Ei strategisk hungersnaud blir nytta som våpen og påfører barn skader og traume dei vil slite med resten av livet. Sivile mål blir bomba og det finnast ingen trygge soner. Livsgrunnlaget for folket på Gaza er fjerna.

Dette er kollektiv avstraffing av sivile – eit folkemord, og det er tydelege brot på Genèvekonvensjonane og folkeretten Det internasjonale rettssystemet blir ignorert og situasjonen bidrar såleis til å undergrave det moralske og rettslege grunnlaget for det internasjonale samfunnet.

Situasjonen på Gaza og på Vestbredden krev at vi hever våre røyster med klare krav:

• Stopp bombing, invasjon og overgrep mot sivile i Gaza!
• Umiddelbar humanitær naudhjelp og bistand!
• Stå saman med andre land om ein boikott av Israel!
• Trekk ut økonomiske investeringar og innfør økonomiske sanksjonar!
• Alle krigsbrotsverk skal etterforskast!
• Arbeid for ei varig løysing i tråd med folkeretten!

Folkehøgskulane tar samstundes avstand frå antisemittisme og eit veksande jødehat, samt islamofobi, som har oppstått i forlenginga av konflikten mellom Israel og Palestina. Vi tar òg tydeleg avstand frå Hamas sine terroraksjonar og undertrykking av sitt eige folk.

Folkehøgskulen arbeider for menneskerettar og demokratiske verdiar, og bidrar med konkret demokratiopplæring på sine skular, på danningsreiser og ved kulturutveksling over heile verda. Vi trur på dei unge si kraft til å bidra til endring, og vi forpliktar oss til å arbeide for danning, kunnskap og opplysning og å bidra til å utvikle evna til dialog.

Vi står saman med dei unge for å kjempe for ein rettferdig fred mellom Israel og Palestina. Folkehøgskulen vil bidra til at ungdommane sine stemmer blir ei viktig kraft i sivilsamfunnet, i den politiske debatten og i det offentlege ordskiftet.

Stopp krigen i Gaza!

Folkehøgskoleforbundet

v/Einar Opsvik